شنگھائی (ٹیک ڈیسک): چینی کمپنی ایگی بوٹ کے اے 2 نامی انسان نما روبوٹ نے 65 میل تک چہل قدمی کرکے گنیز ورلڈ ریکارڈ اپنے نام کرلیا۔مشرقی چین کے صوبے جیانگسو کی Jinji جھیل سے اس روبوٹ نے 10 نومبر کو چہل قدمی شروع کی جو 13 نومبر کو شنگھائی کے علاقے Bund میں جاکر ختم ہوئی۔کمپنی کے مطابق اے 2 روبوٹ نے اس عرصے میں 106 کلومیٹر سے زائد فاصلہ طے کیا۔اس طرح اس نے روبوٹ کے طور پر سب سے طویل فاصلہ پیدل چل کر طے کرنے کا گنیز ورلڈ ریکارڈ اپنے نام کرلیا۔اس ریکارڈ کے لیے اے 2 نے یہ فاصلہ رکے بغیر طے کیا اور ایسا ہاٹ سوایپ ایبل بیٹری سسٹم کی بدولت ہوا جس کے باعث وہ مسلسل سفر کرتا رہا۔
ایگی بوٹ کے سنیئر نائب صدر وانگ چوانگ نے بتایا کہ 2 صوبوں کے درمیان روبوٹ کی چہل قدمی اس ٹیکنالوجی کی پائیداری اور استحکام کی عکاسی کرتی ہے۔
انہوں نے کہا کہ جیانگسو سے شنگھائی تک مسلسل چلنا بیشتر افراد کے لیے بھی مشکل ہوتا ہے مگر ایک روبوٹ نے اسے مکمل کیا۔
ان کا کہنا تھا کہ اس چیلنج سے اے 2 روبوٹ کی قوت برداشت، ہارڈ وئیر پائیداری اور توازن جیسی صلاحیتیں ثابت ہوتی ہے۔
یہ روبوٹ 5.74 فٹ لمبا ہے اور اس کا وزن 55 کلوگرام ہے۔
اس میں آرٹی فیشل انٹیلی جنس (اے آئی) ٹیکنالوجی پر مبنی سنسنگ فیچرز موجود ہیں جن کی بدولت وہ ٹیکسٹ، آڈیو اور بصری تفصیلات کا تجزیہ کرسکتا ہے۔
اس کے علاوہ وہ سوئی میں دھاگا ڈالنے جیسے کام بھی کرسکتا ہے۔
کمپنی کے مطابق اپنے سفر کے دوران وہ شہری سڑکوں، ایکسپریس ویز، پل، ڈھلوانوں اور دیگر جگہوں سے گزرا۔
اس سفر کے دوران اس نے ٹریفک قوانین کی مکمل پابندی کی اور 100 کلومیٹر سے زائد مسلسل چلنے کے باوجود اپنی منزل پر پہنچنے کے بعد وہ بالکل ٹھیک تھا۔
اپنے سفر کے لیے اس نے ڈوئل جی پی ایس ماڈیولز اور لیڈار سنسرز کو استعمال کیا۔
