ممبئی (شوبز ڈیسک): بالی ووڈ کی سُپر ہٹ کرائم ڈرامہ سیریز ‘مرزا پور’ کا تیسرا سیزن ایمیزون پرائم ویڈیو پر سب سے زیادہ دیکھے جانے والا شو بن گیا ہے۔بھارتی میڈیا کے مطابق حال ہی میں ریلیز ہونے والی سیریز ‘مرزا پور’ کے تیسرے سیزن کو بھی عالمی سطح پر خوب مقبولیت مل رہی ہے اور اسے بڑے پیمانے پر دیکھا جارہا ہے۔
رپورٹ میں بتایا گیا کہ ‘مرزا پور’، اُن ٹاپ 10 سیریز کی فہرست میں شامل ہوگئی ہے جنہیں 80 سے زائد ممالک میں دیکھا گیا ہے۔
جرائم پر مبنی اس سیریز کو بھارت میں ایمیزون پرائم ویڈیو پر سب سے زیادہ دیکھا جارہا ہے اور ہر گزرتے دن کے ساتھ ‘مرزا پور 3′ کی مقبولیت میں اضافہ ہورہا ہے۔
پرائم ویڈیو میں انڈیا اوریجنلز کے سربراہ نکھل مدھوک کے مطابق ‘مرزا پور’ کے تیسرے سیزن نے پچھلے دو سیزن کے تمام ریکارڈز توڑ دیے ہیں۔
واضح رہے کہ ایکسل میڈیا انٹرٹیمنٹ کی پروڈکشن میں بننے والی ویب سیریز کے ہدایتکار گورمیت سنگھ اور آنند ایر ہیں، ‘مرزا پور’ کا یہ تیسرا سیزن دس اقساط پر مشتمل ہے۔
ویب سیریز کی مرکزی کاسٹ میں پنکج ترپاٹھی، علی فضل، شیوتا ترپاٹھی، راسیکا دگل، وجے ورما اور دیگر فنکار شامل ہیں۔
