کراچی (اسپورٹس ڈیسک): آئی ایم سی اوور فور ٹی ٹی ٹوئنٹی کرکٹ ورلڈ کپ کی تاریخوں میں تبدیلی کر دی گئی ہے۔آئی ایم سی اوور فور ٹی ٹی ٹوئنٹی کرکٹ ورلڈ کپ کی تفصیلات ایک اہم اجلاس میں طے کی گئیں، جو حال ہی میں چیئرمین (پی وی سی اے) فواد اعجاز خان، وزیر کھیل و امورِ نوجوانان سردار محمد بخش خان مہر، اور سیکریٹری اسپورٹس سندھ منور علی مہیسر کے درمیان وزیر کے دفتر میں منعقد ہوا۔
پاکستان ویٹرنز کرکٹ ایسوسی ایشن (پی وی سی اے) کے چیئرمین فواد اعجاز خان کے مطابق یہ فیصلہ نیشنل گیمز کے باعث کیا گیا ہےجو حکومت سندھ کے زیر اہتمام6 سے 13 دسمبر 2025 تک کراچی کے مختلف مقامات پر منعقد ہوں گے اس سے قبل اس کا انعقاد یکم سے 13 دسمبر 2025 تک طے کیا گیا تھا۔
نیشنل گیمز میں 7 ہزار سے زائد کھلاڑی، آفیشلز اور ٹیکنیکل اسٹاف شرکت کریں گے، ٹورنامنٹ کے دوران کل 42 میچز مختلف میدانوں پر کراچی میں کھیلے جائیں گے ، پاکستان ٹیم کے تمام میچز فلڈ لائٹس میں ہوں گے اور یہ میچز براہ راست نشر کیے جائیں گے اور ڈیجیٹل پلیٹ فارمز پر بھی اسٹریم ہوں گے۔
چیئرمین پی وی سی اے نے کہا کہ ہمارا ٹورنامنٹ ابتدائی طور پر یکم سے 13 دسمبر تک شیڈول تھا مگر ایک ہی وقت میں 2 بڑے ایونٹس کے انعقاد سے حکومت سندھ کو سکیورٹی اور لاجسٹک کے حوالے سے شدید مشکلات کا سامنا ہو سکتا تھا۔
اس تصادم سے بچنے اور وزیراعلیٰ سندھ سید مراد علی شاہ کی خواہش، جنہوں نے نیشنل گیمز کی خود نگرانی لی ہے اور پاکستان کرکٹ بورڈ کے مشورے پر ہم نے ٹورنامنٹ کی تاریخوں میں تبدیلی کا فیصلہ کیا۔
فواد اعجاز کے مطابق ہم نے تمام 12 شریک ممالک جن میں پاکستان، آسٹریلیا، جنوبی افریقا، ویسٹ انڈیز، سری لنکا، ہانگ کانگ، زمبابوے، کینیڈا، سعودی عرب، یو اے ای، امریکا اور ریسٹ آف دی ورلڈ ٹیم شامل ہیں، ان کو اعتماد میں لے لیا ہے ، ہم تمام ٹیموں کے تعاون اور ہماری درخواست کو قبول کرنے پر ان کے بے حد شکر گزار ہیں۔
پی وی سی اے کے سربراہ نے مزید کہا کہ نیا شیڈول کھیلوں کے شائقین کو زبردست کرکٹ سے لطف اندوز کرے گا، کھیلوں کی سیاحت کو فروغ دے گا اور پاکستان کی مہمان نوازی کو دنیا کے سامنے اجاگر کرے گا۔
