لاس اینجلس (شوبز ڈیسک): 80 سے زائد خواتین سے جنسی زیادتی کے الزامات کے بعد گرفتاری دینے والا ہالی وڈ کا جنسی درندہ ہاروی وائن اسٹین اپنے انجام کو پہنچ گیا۔غیر ملکی میڈیا کے مطابق سابق ڈائریکٹر اور پروڈیوسرہاروی وائن اسٹین کو 16 برس قید کی سزا سنائی گئی ہے، اسےلاس اینجلس میں اداکاراؤں کے ساتھ زیادتی کاجرم ثابت ہونے پر سزا سنائی گئی۔
واضح رہے کہ 2013 میں کیے گئے جرائم پرہاروی وائن اسٹین کو گزشتہ برس دسمبر میں مجرم قراردیا گیا تھا۔
اکتوبر 2017 میں شائع ہونے والی نیویارک ٹائمز کی تہلکہ خیز تحقیقاتی رپورٹ میں ہاروی وائن اسٹین کے خلاف اسکینڈل کا انکشاف ہوا تھا جس کے بعد خواتین کی بڑی تعداد نے ہالی وڈ پروڈیوسر سے متعلق ہوش رُبا حقائق سے پردہ اٹھایا تھا۔
ان ہی انکشافات کے بعد ’می ٹو‘ مہم کا بھی آغاز ہوا تھا، وائن اسٹین پر الزامات لگانے والی خواتین میں ہالی وڈ کی صف اول کی اداکارائیں انجیلینا جولی، سلمیٰ ہائیک، گائینتھ پیلٹرو، ایشلے جَڈ، روز میک گوئن اور ہیتھر گراہم شامل ہیں۔
