ممبئی (شوبز ڈیسک): بھارتی ٹی وی اسٹار اور دی کپل شرما شو کی معروف اداکارہ سمونا چکرورتی نے انکشاف کیا ہے کہ دوران شو کپل نے اپنی لائن بھولنے کے بعد میرے ہونٹوں اور منہ کا مذاق اڑانا شروع کیا تھا جو مجھے بے حد برا لگا تھا ۔سمونا چکرورتی ’دی کپل شرما شو ‘میں کامیڈی اسٹار کپل شرما کی آن اسکرین بیوی کا کردار نبھاتی رہی ہیں اور اب بھی وہ شو کا اہم حصہ ہیں، حال ہی میں بھارتی میڈیا کو دیے گئے انٹرویو میں سمونا نے انکشاف کیا کہ شو میں شروعات کے دن بہت مشکل تھے، کیوں کہ مجھے یاد ہے کہ کپل نے لائن بھولنے کے بعد میرے منہ کا مذاق اڑایا تھا،کپل نے شو کی پہلی قسط میں میرے منہ کا مذاق اڑانے کی کوشش کی لیکن اس مذاق پر کوئی نہیں ہنسا تھا تاہم دوسرے شو میں یہ مذاق کام کرگیا جب میں نے بہت برا محسوس کیا تھا۔
سمونا نے بتایا کہ اس وقت ارچنا میرے ساتھ ہی بیٹھی تھیں، میرے برا محسوس کرنے پر انہوں نے مجھ سے کہا کہ ‘آپ پریشان کیوں ہیں؟ جس پر میں نے انہیں واضح کیا کہ اس نے میرے منہ، میرے ہونٹوں حتیٰ کہ ہر چیز کا مذاق اڑایا ہے، میں اسکرپٹ کی لائنز نہیں بھولی لیکن کپل بھول گئے ہیں اور کپل نے وہ کچھ بھی کہا ہے جو اسکرپٹ کا حصہ نہیں تھا، میں اسٹینڈ اپ کامیڈین نہیں ہوں، میں اس طرح لوگوں کو انٹرٹین نہیں کرسکتی’۔
جس پر ارچنا نے مجھے کہا کہ اگر خود پر ہنسیں تو آپ کبھی بھی برا محسوس نہیں کریں گی اور اگر بات کروں آپ کے چہرے یا ہونٹوں کی تو میں ایسی خواتین کو جانتی ہوں جو ایسا دکھنے کیلئے پیسے ادا کرتی ہیں۔
سمونا کے مطابق وہ پہلے بہت بھولی بھالی سی تھیں لیکن اس کے بعد انہوں نے سرخ لپ اسٹک لگا نا شروع کردی ۔
سمونا کا کہنا تھا کہ بیک اسٹیج اکثر لوگ مجھ سے سوال کرتے ہیں آپ کیسے کسی زن بیزار شو (misogynist show)کا حصہ بن سکتی ہیں ؟ جس پر میں انہیں سمجھاتی ہوں کہ یہ سب اسکرپٹ کا ایک حصہ ہے اور میں شو میں ان شرائط پر شامل ہوئی ہوں، میں ایک قابل صورت لڑکی ہوں اور رہی بات شو کی تو کپل سمونا کے چہرے کا مذاق نہیں اڑاتے بلکہ وہ دوران شو میاں بیوی کے جھگڑے کے وقت ایسا کرتے ہیں۔
ٹی وی اسٹار کا مزید کہنا تھا کہ اداکار رتیش دیش مکھ کپل شرما شو کے 10 سال میں وہ پہلے اداکار ہیں جنہوں نے شو کی تعریف کرنے کے علاوہ یہ بھی کہا تھا کہ سمونا آپ جانتی ہیں کپل آپ کے بغیر اتنا بڑا کامیڈین نہیں بن سکتا تھا جتنا وہ آج ہے۔
