ینگزو (اسپورٹس ڈیسک): ایشین گیمز کے سیمی فائنل میں افغانستان نے پاکستان کو 4 وکٹوں سے شکست دے دی۔ینگزو میں ہونے والے ایشین گیمز کے سیمی فائنل میں افغانستان نے پاکستان کیخلاف ٹاس جیت کر پہلے پاکستان کو بیٹنگ کی دعوت دی تاہم پاکستان کی ٹیم افغانستان کو متاثر کن ہدف دینے میں ناکام رہی۔
پاکستان کی پوری ٹیم 115 رنز پر پویلین لوٹ گئی ہے جس کے بعد افغانستان کو جیت کیلئے 116 رنز درکار تھے افغانستان نے 17 اوورز اور 5 گیندوں میں 6 وکٹوں کے نقصان پر مقررہ ہدف پورا کرلیا۔
میچ میں پاکستان ٹیم کی قیادت قاسم اکرم نے کی، پاکستان کی جانب سے عمیر بن یوسف 24 رنز بناکر نمایاں رہے عرفات منہاس 14 رنز بنا کر ناقابل شکست رہے، عامر جمال نے 14 اور روحیل نذیر نے 10 رنز بنائے۔واضح رہے کہ اس سے قبل سیمی فائنل میں بھارت نے بنگلا دیش کے خلاف کامیابی حاصل کی تھی ، افغانستان فائنل میں بھارت کا سامنا کرے گی۔
ایشین گیمز کبڈی کے سیمی فائنل میں پاکستان کو بھارت کے ہاتھوں شکست ہوگئی۔سیمی فائنل میں بھارت نے پاکستان کو 14-61 سے شکست دے کر فائنل میں جگہ بنالی۔سیمی فائنل میں پاکستانی ٹیم بھارت کے خلاف 12 مرتبہ آل آؤٹ ہوئی اور پاکستان ٹیم حریف کے خلاف ایک آل آؤٹ پوائنٹ بھی نہ لے سکی۔
سیمی فائنل میں بھارت کے ہاتھوں شکست کے بعد پاکستان ٹیم برانز میڈل کی حقدار قرار پائی۔خیال رہے ایشین گیمز میں یہ پاکستان کا تیسرا میڈل ہے، پاکستان نے اس سے قبل شوٹنگ میں برانز اور اسکواش میں سلور میڈل جیتا ہے۔
