کراچی (ویب ڈیسک): امریکی ریاست ورجینیا میں ایک ایلمینٹری اسکول کی کلاس میں 6 سالہ بچے نے فائرنگ کر دی جس کے نتیجے میں ایک ٹیچر شدید زخمی ہو گئی۔ غیر ملکی خبر رساں ادارے ’اے ایف پی‘ کے مطابق یہ واقعہ ساحلی شہر نیوپورٹ نیوز کے رچنیک ایلمینٹری اسکول میں پیش آیا، جس میں تمام طلبہ محفوظ رہے۔
مقامی پولیس چیف اسٹیو ڈریو نے نیوز کانفرنس میں بتایا کہ 6 سالہ طالب علم اس وقت پولیس کی حراست میں ہے، مزید بتایا کہ یہ حادثاتی فائرنگ نہیں تھی۔
پولیس نے بتایا کہ متاثرہ ٹیچر کی عمر 30 سال سے زائد ہے، اور ان کو جو زخم آئے ہیں، اس سے ان کی جان بھی جا سکتی ہے۔
شہر کے سپرنٹنڈنٹ آف اسکولز جورج پارکر نے بتایا کہ میں صدمے میں ہوں اور مایوس ہوں۔ ان کا کہنا تھا کہ ہمیں کمیونٹی کی حمایت کی ضرورت ہے تاکہ نوجوانوں کی بندوقوں تک رسائی کو نہ ہونے کو یقینی بنایا جاسکے۔
واضح رہے کہ 15 نومبر کو میڈیائی رپورٹ کے مطابق امریکی ریاست ایڈاہو اور ورجینیا میں 2 یونیورسٹی کیمپسز میں پرتشدد واقعات میں 7 طلبہ جاں بحق ہوگئے تھے۔
اسی طرح 25 مئی کو امریکی ریاست ٹیکساس کے ایک ایلیمنٹری اسکول میں ایک 18 سالہ بندوق بردار نے کلاس رومز میں جا کر فائرنگ کر دی تھی جس کے نتیجے میں کم از کم 19 بچے ہلاک ہو گئے تھے۔
گن وائلنس ڈیٹا بیس کے مطابق امریکا میں گزشتہ برس فائرنگ سے متعلقہ واقعات میں 44 ہزار افراد ہلاک ہو گئے تھے، جس میں سے تقریباً آدھے قتل، حادثات اور اپنے دفاع کے کیسز تھے، اور آدھے خودکشی کے واقعات تھے۔
